తీర్పు దినము

“జీవగ్రంథము” అనేది పాత నిబంధనలో లోతైన మూలాలు కలిగిన క్రొత్త నిబంధన భావన (నిర్గమకాండము 32:32-33; దానియేలు 12:12; మలాకీ 3:16). పాత నిబంధన కాలంలోని విశ్వాసులు పాత నిబంధనను ఘనపరచినందున, విశ్వాసం ద్వారా కృప చేత రక్షించబడ్డారు. యేసు క్రొత్త నిబంధన ఆరంభించినప్పుడు, “మీ పేరులు పరలోకమందు వ్రాయబడియున్నవని సంతోషించుడి,” అని ఆయన తన శిష్యులతో చెప్పెను (లూకా 10:20). యేసు యొక్క ఇతర నమ్మకమైన పరిచారకులతో పాటు వారి పేరులు జీవగ్రంథములో వ్రాయబడినవని గుర్తుచేస్తూ పౌలు విశ్వాసులను ప్రోత్సహించాడు (ఫిలిప్పీయులకు 4:3), అలాగే “పరలోకమందు వ్రాయబడియున్న” వారిని సంఘము కలిగియున్నదని హెబ్రీ పత్రిక యొక్క గ్రంథకర్త ప్రకటించాడు (హెబ్రీయులకు 12:23).

ఒక వ్యక్తి పేరు జీవగ్రంథములో నమోదు కావాలంటే, అతడు లేదా ఆమె తన స్వనీతి సరిపోతుందనే భావనను విసర్జించాలి. అపొస్తలుడైన పౌలు వ్రాసినట్లుగా, “[ఒక వ్యక్తి] యేసు క్రీస్తునందలి విశ్వాసమువలననేగాని ధర్మశాస్త్రసంబంధమైన క్రియలమూలమున నీతిమంతుడుగా తీర్చబడడని యెరిగి మనమును ధర్మశాస్త్రసంబంధమైన క్రియలమూలమున గాక క్రీస్తునందలి విశ్వాసము వలననే నీతిమంతులమని తీర్చబడుటకై యేసు క్రీస్తునందు విశ్వాసముంచియున్నాము; ధర్మశాస్త్రసంబంధ క్రియలమూలమున ఏ శరీరియు నీతిమంతుడని తీర్చబడడు గదా” (గలతీయులకు 2:16). విశ్వాసులు-జీవగ్రంథములో ఎవరి పేర్లైతే వ్రాయబడినవో- వారి క్రియలమూలముగా ఎన్నడూ తీర్పు తీర్చబడరు మరియు ధవళమైన మహా సింహాసనము యొక్క తీర్పులోనికి రారు.

ప్రతి వ్యక్తి యొక్క మంచి మరియు చెడు క్రియలను వేరే గ్రంథములు నమోదు చేస్తాయని ప్రకటన 20:12 చెబుతుంది.

అంత్యకాలములో, ప్రతి వ్యక్తి జీవగ్రంథములోని విషయముచేతగాని లేదా తమ క్రియలను నమోదు చేస్తున్న గ్రంథముల సముదాయముచేత తీర్పు తీర్చబడతారు. జీవగ్రంథాన్ని తిరస్కరించడానికి మరియు ఇతర గ్రంథములలో నమోదు చేయబడిన క్రియలచొప్పున తాము తీర్పు తీర్చబడటానికి ఎవరికైనా యెంచుకునే అధికారం ఉన్నది. ఎటువంటి పాపములు లేకుండా, తమ మంచి క్రియలు మాత్రమే ఆ గ్రంథములో నమోదు చేయబడితే, ఆ వ్యక్తి పరలోకానికి అర్హుడు. అయితే, సంపూర్ణ నైతిక పరిపూర్ణతయే దేవుని ప్రామాణికము. ఒకవేళ ఒక్క పాపమైనా అక్కడ నమోదు చేయబడితే, అది ఎంత చిన్నదైనా సరే ఆయన కనుగొంటే, అగ్ని గంధకములుగల గుండములో నిత్య బాధయే శిక్షావిధి. దేవుని కుమారుడు తప్ప మరెవరూ పాపము లేకుండా జీవించలేదు (2 కొరింథీయులకు 5:21). మరియు మనమందరమూ భ్రష్ట స్వభావములతో నశించిన లోకములో జీవిస్తున్న మానవులము గనుక, ఎవ్వరూ ఎప్పటికీ పాపములేనివారుగా జీవించలేరు (రోమా 3:23).

అంత్యకాలానికి ఏ గ్రంథములో వ్రాసి ఉంచినది ఉపయోగించబడుతుందో ఎంచుకోవడానికి ఈ రోజు మనకు అవకాశం ఉంది. అయితే, మనం చనిపోతే మాత్రం పరిస్థితి చేయి దాటిపోయినట్లే. ప్రజలందరూ దేవుని ముందు నిలబడినప్పుడు-బహుమతులు పొందటానికి విశ్వాసులు, శిక్షను స్వీకరించడానికి ధవళమైన మహా సింహాసనమునొద్ద అవిశ్వాసులు-భూమిపై ఉన్నప్పుడు మనం ఎంచుకున్నదాని యొక్క పరిణామాలను ఆయన కొలుస్తాడు.

మనం నిత్యజీవమును ఎలా పొందుకుంటాము? ఒకటే మాట- క్రీస్తు.

మరి మనం ఎప్పుడు దాన్ని కోరుకోవాలి? మరలా, ఒకటే మాట- ఇప్పుడే.

ధవళమైన మహా సింహాసనం యొక్క తీర్పును వివరించడంలో యోహాను యొక్క ఉద్దేశ్యం స్పష్టంగా ఉంది. యేసుక్రీస్తునందు విశ్వాసం ద్వారా కృపచేత దేవుని ఉచిత వరమైన రక్షణను తిరస్కరించడం ద్వారా కలిగే శాశ్వతమైన పరిణామాలను భీతిని పుట్టించే సరళతతోను యథార్థతతోను వెల్లడించాడు. ఈ నిర్ణయం వాయిదా వేయకూడదు, ఎందుకంటే రేపు సూర్యోదయానికి ముందే ఎవరి జీవితమైనా ముగిసిపోవచ్చు. తాను మరణించే సమయంలో, ఒక వ్యక్తి తీసుకునే నిర్ణయం ఎప్పటికీ ముద్రవేయబడుతుంది.

తెలివిగా ఎంచుకోండి.

మరణం తరువాత ఒక వ్యక్తికి ఏమి జరుగుతుంది?

“మనుష్యులొక్కసారే మృతిపొందవలెనని నియ మింపబడెను; ఆ తరువాత తీర్పు జరుగును.” (హెబ్రీయులకు 9:27)