సంఘము యొక్క “కనిపించని రత్నము” ను కనుగొనడం

ఆరాధన . . . ఆరాధన గురించి ఆలోచిద్దాం. మీరు చివరిసారిగా “సంఘము” తో ఆడుకోవటం ఆపి నిజంగా ఆరాధించడం ప్రారంభించాలని ఎప్పుడు నిర్ణయించుకున్నారు?

నిజం తెలియాలంటే, చాలా మంది విశ్వాసులకు ఆరాధన అంటే ఏమిటో తెలియదు. మనము ఆశ్చర్యపోతాము,

• ఆరాధన అంటే నేను పాడేటప్పుడు మరియు ప్రార్థన చేసేటప్పుడు నా చేతులు పైకెత్తడమా, కొంతమంది క్రైస్తవులు చేస్తున్నట్లుగా?
• ఆరాధన అంటే నేను కళ్ళు మూసుకొని పరలోక సంబంధమైనదాన్ని ఊహించుకోవడమా, నేను భూసంబంధమైన వాటితో పరధ్యానం చెందకుండా ఉండటానికి?
• ఆరాధన అంటే నాకు కొంచెం పరవశం కలిగించే భావాలు కలగడమా, బహుశా అతీంద్రియానికి దగ్గరగా?

ఆరాధన అంటే ఏమిటి? మరి ఇది అంత అరుదైన విషయమా? 1961 లో, ఆయన కెనడాలోని అసోసియేటెడ్ గోస్పెల్ చర్చిల పాస్టర్‌లతో మాట్లాడుతున్నప్పుడు, దివంగత A.W. టోజర్ ఆరాధన “ఆధునిక సువార్త ప్రచారంలో కనిపించని రత్నము”¹ అని చెప్పాడు. ఆయన ఆ కాలానికి కాదు, ఈ ఆధునిక కాలానికి చెందిన ప్రవక్త అని నేను అనుకుంటున్నాను.

నన్ను మిమ్మల్ని అడగనివ్వండి: మీరు సంఘానికి వెళ్ళే చోట మీరు ఆరాధించుచున్నారా? “అవును,” అని మీరు చెప్తారు, “మా సంఘంలో బైబిల్ బోధన నాకు చాలా ఇష్టం.” అది నా ప్రశ్న కాదు. “ఓహ్, గానం అద్భుతంగా ఉంటుంది.” అది కూడా నా ప్రశ్న కాదు. మీరు బైబిల్‌ను ఇష్టపడతారని నాకు తెలుసు. మీరు ఇష్టపడకపోతే మీరు ఈ పరిచర్యకు సహాయం చెయ్యరు. అలాగే మీరు బహుశా పాడటానికి ఇష్టపడతారు. నేను ఆ విషయాల గురించి అడగటం లేదు. నేను అడుగుచున్నదేమంటే, మీరు ఆరాధించుచున్నారా?

నాకు బాగా ఆందోళన కలిగించేది ఏమిటంటే మనము “సంఘము” తో ఆటలు ఆడుచున్నాము. మనము దుస్తులు ఎలా ధరించుకోవాలో నేర్చుకుంటాము, ఎలా కూర్చోవాలో నేర్చుకుంటాము మరియు ఎలా కనిపించాలో నేర్చుకుంటాము. మనము పాటల యొక్క మాటలను కూడా నేర్చుకుంటాము. కానీ మనము వాటిని పాడేటప్పుడు మన దృష్టి సంగతి ఏమిటి? “మా కర్త గట్టి దుర్గము” అని మనము పాడుతున్నప్పుడు, ఆమె ఎందుకు అలాంటి దుస్తులు ధరించింది? అని మనం ఆలోచిస్తూ ఉంటాము. “సముజ్వ లాయుధమ్ము.” నేను నా కారులో లైట్లు ఆపేసానా? మన ముఖవైఖరిలో ఏమాత్రం మార్పులేకుండానే మనం అలా చేయగలం. అది ఆరాధన కాదు–అది సంఘముతో ఆటలాడుకోవడం. నేను నిజంగా అద్భుతం, ప్రేమ మరియు స్తుతుల్లో మైమరచిపోయినప్పుడు, నేను మీకు చెప్పాలి, నా పేరు కూడా నాకు తెలియని సందర్భాలు ఉన్నాయి.

సరియైన మాటలు దొరకడంలేదు గాని, బలమైన, ఆయన సన్నిధి యొక్క బలముతో, నాతో సహా దేనినైనా లేదా మరెవరినైనా పట్టించుకునే శక్తి నాకు లేనటువంటి ఆరాధన జరిగిన సమావేశాలలో నేను ఉన్నాను. నా దేవుని స్తుతించటంలో నేను పూర్తిగా మైమరచిపోయాను.

మీరు కరిస్మాటిక్ లేదా నాన్-కరిస్మాటిక్ సంఘానికి వెళ్తున్నారా అనేదానికి ఇది సంబంధం లేదు. అది డినామినేషనలా లేదా నాన్-డినామినేషనలా నేను పట్టించుకోను. ఇది పట్టణమైనా, గ్రామీణమైనా, పెద్దదైనా, చిన్నదైనా నేను పట్టించుకోను. మీరు సమకాలీన సంగీతాన్ని కలిగి ఉండవచ్చు లేదా అత్యంత సాంప్రదాయక కీర్తనలను పాడవచ్చు అయినను ఇప్పటికీ ఆరాధన యొక్క అద్భుతాన్ని పోగొట్టుకుంటున్నారు. ఆరాధన అనేది ఒక డినామినేషన్‌తో ముడిపడి ఉండదు లేదా ఒక నిర్దిష్ట శైలిపై ఆధారపడి ఉండదు. ఇది వాటన్నింటికంటే చాలా ఎక్కువ!

మరి, ఆరాధన అంటే ఏమిటి? డాక్టర్ రాన్ అలెన్, సెమినరీ సమయంలో నా క్లాస్‌మేట్ మరియు ఇప్పుడు డల్లాస్ థియోలాజికల్ సెమినరీలో ప్రొఫెసర్, ఆయన వ్రాసేటప్పుడు లోతుగా త్రవ్వాడు,

“ఆరాధన అనేది దేవునికి క్రియాశీల ప్రతిస్పందన, తద్వారా మనం ఆయన శ్రేష్ఠతను ప్రకటిస్తాము. ఆరాధన స్తబ్ధముగా ఉండేది కాదు; కానీ పాల్గొంటుంది. ఆరాధన అంటే కేవలం మానసిక స్థితి కాదు; అది ప్రతిస్పందన. ఆరాధన అనేది కేవలం ఒక భావన కాదు; అది ఒక ప్రకటన . . . .

ఆరాధన అనే ఆంగ్ల పదం అది వివరించే చర్యను అద్భుతంగా వ్యక్తపరుస్తుంది. ఈ పదం ఆంగ్లో-సాక్సన్ weorthscipe నుండి వచ్చింది, తర్వాత అది worthship గా మార్చబడింది మరియు చివరకు ఆరాధన (worship) గా మార్చబడింది. ఆరాధన అంటే ఏదైనా లేదా ఎవరికైనా ‘శ్రేష్ఠతను ఆపాదించటం.'”²