శిశువునకు నేర్పవలసిన సరియైన త్రోవ

బాలుడు నడువవలసిన త్రోవను వానికి నేర్పుము,
వాడు పెద్దవాడైనప్పుడు దానినుండి తొలగిపోడు. (సామెతలు 22: 6)

సామెతలు 22: 6 బహుశా పిల్లల పెంపకం విషయంలో బాగా తెలిసిన వాక్యభాగం, అలాగే చాలా తప్పుగా అర్ధం చేసుకోబడింది. ఈ సామెత యొక్క ఒక సంప్రదాయ సిద్ధమైన వ్యాఖ్యానం ఈ విధంగా ఉన్నది:

మీ పిల్లలు సండే స్కూలుకు మరియు చర్చికి క్రమం తప్పకుండా హాజరవుతున్నారో లేదో నిర్ధారించుకోండి. పది ఆజ్ఞలను తెలుసుకోవాలని మరియు పాటించాలని మీ పిల్లలకు నేర్పండి; భోజన సమయంలో, నిద్రవేళలో మరియు అత్యవసర పరిస్థితుల్లో ప్రార్థన చేయమని వారికి నేర్పండి. మరియు బైబిల్ వాక్యాల యొక్క స్థిరమైన ఆహారాన్ని వారికి ఖచ్చితంగా తినిపించండి. దీన్ని ముందుగానే చేయండి, ఎందుకంటే – చూడండి! – యౌవనకాల తిరుగుబాటు, ఈ సమయంలో వారు అనేకమందితో శారీరక సంబంధాలు పెట్టుకుంటారు, యిది వారి ఆధ్యాత్మిక ప్రయాణాన్ని ప్రక్కదారి పట్టిస్తుంది. వారి క్షణిక సుఖాలు ముగిసినప్పుడు, వారు తిరిగి దేవుని వద్దకు వస్తారు. ఈ వాక్యముపై దేవుని వాగ్దానం ఉన్నందున మీరు దీన్ని విశ్వసించవచ్చు.

సంప్రదాయ సిద్ధమైన వ్యాఖ్యానానికి వ్యతిరేకంగా రెండు ప్రధాన ఆరోపణలు ఉన్నాయి. మొదటిది, హెబ్రీ కవి ఉపయోగించిన చాలా రంగురంగుల, క్లిష్టమైన పద-చిత్రాలను అభినందించడంలో ఇది విఫలమైంది. రెండవది, ఇది అనుభవపూర్వకంగా నిజం కాదు. కొంతమంది యువకులు తిరుగుబాటు చేసి తిరిగి దారిలోనికి వచ్చారు, కాని చాలా మంది తిరిగి రాలేదు. బదులుగా వారి పాపాన్ని సమాధి వరకు కొనసాగించాలని కోరుకున్నారు.

తమ పిల్లల ముందుంచడానికి తల్లిదండ్రులకు రెండు ఆప్షన్లు ఉన్నాయని మరొక వ్యాఖ్యానం సూచిస్తుంది: నీతివంతమైన, జ్ఞానముగల మార్గం లేదా నాశనకరమైన, మూర్ఖమైన మార్గం. వారిని నీతిగల దారిలో పంపండి అప్పుడు వారు సుదీర్ఘమైన, నీతివంతమైన జీవితాన్ని పొందుతారు. సరిగ్గా విచక్షణగల సలహా కాదు. బాగా ఉపయోగకరంగాను లేదు. జ్ఞానం సాధారణంగా తక్కువ స్పష్టమైన అంతర్దృష్టిని అందిస్తుంది.

ఈ వాక్యం యొక్క మంచి వివరణ కవి హెబ్రీ భాషను ఉపయోగించడం యొక్క సంక్లిష్టతకు ప్రశంసలతో ప్రారంభమవుతుంది. ఈ సరళమైన, ఆరు పదాల ద్విపది కవితా ప్రస్తావన మరియు రూపకంతో జాలువారుతుంది. ఏ తల్లిదండ్రులూ కోల్పోలేని ఆచరణాత్మకమైన, ఓదార్పునిచ్చే జ్ఞానాన్ని తెలియజేస్తుంది. ఈ పాఠాల్లోని ముఖ్యమైనవి రెండు పదాలలో చూడవచ్చు.

నేర్పించండి

హనాఖ్ అనే హెబ్రీ పదానికి “సమర్పించుట” లేదా “ప్రతిష్ఠ చేయుట” అని అర్ధం. ఇది పాత నిబంధనలో నాలుగు సార్లు మాత్రమే ఉపయోగించబడింది, భవనాన్ని అంకితం చేయడానికి మూడుసార్లు మరియు సామెతలు 22: 6 లోని పిల్లలను ఉద్దేశించి ఒకసారి. అనేక సెమిటిక్ భాషలలో, ఇది పైకప్పు లేదా నోటి దిగువ భాగానికి సంబంధించిన పదం నుండి వచ్చింది. ఒక అరబిక్ క్రియాపదము, హనాఖ్ పదానికి సమీప జ్ఞాతి. ఒక మంత్రసాని నవజాత శిశువు యొక్క అంగిలి మరియు చిగుళ్ళను మర్దనం చేయడానికి పిండిచేసిన ఖర్జూరపండ్ల కొలనులో వేలును ముంచడమనే ఆచారమును ఈ అరబిక్ పదం చూపిస్తుంది. ఇది శిశువు పాలు కుడిచే ప్రవృత్తిని ప్రోత్సహించింది, తద్వారా వీలైనంత త్వరగా స్తన్యపానము ప్రారంభమవుతుంది. మరో మాటలో చెప్పాలంటే, పిల్లలకి ప్రయోజనం కలిగించే ప్రవర్తనను ప్రోత్సహించడానికి ఆమె శిశువు చిగుళ్ళను ప్రేరేపించింది. శిశువు యొక్క సహజ స్వభావాన్ని ఆమె తెలివిగా మరియు నేర్పుగా ఉపయోగించుకుంది.

మనము బలవంతం చేయడానికి బదులుగా కలిగించినప్పుడు ఉత్తమ తల్లిదండ్రుల శిక్షణ సాధ్యపడుతుంది. పిల్లల సహజ కోరికలు మరియు ప్రత్యేకమైన సామర్థ్యాలను కనుగొనడం ద్వారా మరియు తదనుగుణంగా అభివృద్ధి చెందడానికి అనుమతించే ప్రవర్తనను ప్రోత్సహించడం ద్వారా మనము దీన్ని సాధిస్తాము.

పిల్లలు తమ ఇష్టానుసారంగా చేయటానికి లేదా దిద్దుబాటుకు దూరంగా ఉండటానికి మనం అనుమతించాలని చెప్పడంలేదు. దగ్గరి సంబంధం ఉన్న భాషలలో హనాఖ్‌ పదాన్ని పోలిన పదం గుర్రపు శిక్షణకు సంబంధించినది. ఈ భావచిత్రం గుర్రం యొక్క కళ్ళెమును చిత్రీకరిస్తుంది, దాని సత్తువను విచ్ఛిన్నం చేయకుండా దాని సహజ శక్తులను నిర్దేశించే ఉద్దేశ్యంతో ఇది గుర్రాన్ని లొంగదీసుకుంటుంది. అయితే, కళ్ళెము ఒక కాడి కాదని గమనించండి. అనుభవశూన్యుడు మాత్రమే ఆధిపత్యం కోసం గుర్రపు నోటిలో ఒక తాడును ఉంచుతాడు. గుర్రము నోటికి వేసే యినుప కళ్ళెము జంతువుతో సంబంధంలో ఒక బిందువు అని అనుభవజ్ఞులైన రౌతులకు తెలుసు. గుర్రాలు పరుగెత్తాలని కోరుకుంటాయి ఎందుకంటే దేవుడు వాటిని సృష్టించిన ఉద్దేశ్యాన్ని నెరవేర్చాలనే కోరికను వాటికి ఇచ్చాడు. తెలివైన, శ్రద్ధగల రౌతు గుర్రం తన ప్రయోజనాన్ని సురక్షితంగా మరియు సమర్థవంతంగా సాధించడంలో సహాయపడటానికి యినుప కళ్ళెమును మరియు కళ్లెపువారును ఉపయోగిస్తాడు.

హనాఖ్ అనే పదం “అంకితం,” “నోరు,” “లొంగదీసుకోండి” మరియు “అనుభవజ్ఞుడిని చేయండి” అనే ఆలోచనలను మిళితం చేస్తుంది.

అతడు నడువవలసిన త్రోవ

ఈ సామెతలో ఇది చాలా చర్చనీయాంశమైన వాక్యము. హెబ్రీ చాలా సరళంగా “అతని త్రోవకి అనుగుణంగా” లేదా, ఉన్నదున్నట్లుగా, “అతని త్రోవ యొక్క నోటిపై” (మళ్ళీ నోటి భావచిత్రం ఉంది), అయితే దానిని అనువదించడం అంత సులభం కాదు. ఇంతకుముందు చెప్పినట్లుగా, సామెతలు పుస్తకం ఒక వ్యక్తి వెళ్ళగల రెండు మార్గాలను మాత్రమే సూచిస్తుందని కొందరు వాదిస్తారు: జ్ఞానుల మార్గం లేదా మూర్ఖుని మార్గం. విశాలమైన కోణంలో ఇది నిజమే. కానీ రచయిత తన భాషను కళాత్మకంగా ఉపయోగించడం ద్వారా అతని సలహా ప్రస్ఫుటముగా లేదని మనకు చెబుతుంది.

పదబంధంలోని ముఖ్య హెబ్రీ పదం డెరెక్ లేదా “త్రోవ.” ఇది మార్గము వంటి యథాతథమైన త్రోవను సూచిస్తుంది, లేదా యథాతథముగా కాకపోయినా, సామెతలు 30: 18-19 లో చెప్పినట్లుగా ఏదో పనిచేసే విధానాన్ని సూచిస్తుంది.

నా బుద్ధికి మించినవి మూడు కలవు
నేను గ్రహింపలేనివి నాలుగు కలవు.
అవేవనగా, అంతరిక్షమున పక్షిరాజు జాడ,
బండమీద సర్పము జాడ,
నడిసముద్రమున ఓడ నడచుజాడ,
కన్యకతో పురుషుని జాడ.

వీటిలో ప్రతిదానిలో, “జాడ” అనే పదం ఒక స్వాభావిక లక్షణాన్ని సూచిస్తుంది. మనము అతని లేదా ఆమె యొక్క స్వాభావిక లక్షణం ప్రకారం బిడ్డకు శిక్షణ ఇవ్వాలి. కొంతమంది కళాత్మకంగా, మరికొందరు క్రీడాసంబంధులుగా, మరికొందరు విద్యావంతులుగా ఉంటారు. ఒకరు మొండిగాను, మరొకరు విధేయులైనవారుగాను ఉండవచ్చు. ఒక బిడ్డను బహుమతులు లేదా గుర్తింపుతో ప్రోత్సహించవచ్చు, మరొకరు వాటిని పట్టించుకోరు.

ఒక్క సామెతలో నిండిన గొప్ప భావచిత్రాలను మరియు జ్ఞానాన్ని చూడండి. “శిక్షణ” అనేది తల్లిదండ్రులు మరియు పిల్లలు తమ వంతు ప్రయోజనానికి తమను తాము అంకితం చేసే సంబంధాన్ని కోరుతుంది, దానితో పాటు అన్ని ఆధిక్యతలు మరియు బాధ్యతలు ఆమోదము తెలుపుతాయి. ప్రతి ఒక్కరూ సంతోషంగా మరియు పిల్లల లోతైన అవసరాలను తీర్చగల ప్రవర్తనను ప్రోత్సహించే మార్గాలను తల్లిదండ్రులు కనుగొంటారు. అయితే అది ఒక విశృంఖల ఆత్మకు ఉద్దేశ్యము మరియు దిశను ఇవ్వడానికి మార్గనిర్దేశం చేస్తుంది.

మనము ప్రతి బిడ్డను దేవుని చేతిలో నుండి మనకు సరిపోయే విధంగా మట్టితో చేయబడిన ముద్దగా కాకుండా గమ్యం కలిగి ఉన్న ప్రత్యేకమైన, విలక్షణమైన వ్యక్తిగా స్వీకరిస్తాము. మన శిక్షణను అతని లేదా ఆమె లక్షణాలకు అనుగుణంగా మార్చడం ద్వారా ఈ ప్రత్యేకమైన వ్యక్తి యొక్క దేవుని సృష్టిని మనం గౌరవించాలి. దానితో పోరాడటమంటే దేవుని సృష్టితో పోరాడటమే.

బదులుగా, ప్రతి ఒక్కరితో సన్నిహిత సంబంధాన్ని పెంచుకోవడం ద్వారా మీ పిల్లలను అధ్యయనం చేయండి. ప్రతి బిడ్డ తన దారిని, అనగా అతను లేదా ఆమె అనుసరించడానికి సృష్టించబడిన మార్గమును, కనుగొనడంలో సహాయపడండి. అప్పుడు మీ పిల్లల సహజ ధోరణులను వృద్ధిపొందించునట్లుగా మీకు సహాయం చేయమని దేవుడిని అడగండి, తద్వారా అతను లేదా ఆమె దేవుని రూపకల్పనకు అనుగుణంగా జీవించగలరు. పరిపక్వత వచ్చినప్పుడు, అతని లేదా ఆమె యొక్క విజయం మీరందరూ కలిసి ఆనందించగల ఆస్తి అవుతుంది.

Adapted from Parenting: From Surviving to Thriving Workbook (Nashville: W Publishing Group, 2006). Copyright © 2006 by Charles R. Swindoll, Inc. All rights reserved. Used by permission.

Posted in Parenting-Telugu.

Insight for Living Ministries is committed to excellence in communicating the truths of Scripture and the person of Jesus Christ in an accurate, clear, and practical manner so that people will come to an understanding of God’s plan for their lives, as well as their significant role as authentic Christians in a needy, hostile, and desperate world.

లేఖనములోని సత్యాలను మరియు యేసుక్రీస్తు అను వ్యక్తిని గూర్చి ఖచ్చితమైన, స్పష్టమైన మరియు ఆచరణాత్మక పద్ధతిలో తెలియపరచడంలోను, తద్వారా ప్రజలు తమ జీవితాల కోసం దేవుని ప్రణాళికను, అలాగే లేమిలోవున్న, ప్రతికూలమైన మరియు నిరాశతో కూడిన ప్రపంచంలో ప్రామాణికమైన క్రైస్తవులుగా తమ ముఖ్యమైన పాత్రను అర్థం చేసుకోవటానికి ఇన్సైట్ ఫర్ లివింగ్ మినిస్ట్రీస్ ఎంతో ఉత్కృష్టతతో రాణించటానికి కట్టుబడి ఉంది.